पंतप्रधान नरेंद्र मोदी यांनी दिल्लीत 5G नेटवर्क केले लाँच.
अखेर भारतात आज 1 ऑक्टोबर पासून 5G सेवा सुरू झाली आहे. पंतप्रधान नरेंद्र मोदींच्या हस्ते दिल्लीत 5G चे लॉंचिंग करण्यात आले. याप्रसंगी दळणवळण मंत्री अश्विनी वैष्णव यांच्यासह जिओचे प्रमुख मुकेश अंबानी, भारती एअरटेलचे अध्यक्ष सुनील भारती मित्तल, आणि व्होडाफोन आयडियाचे अध्यक्ष कुमार मंगलम बिर्ला हे देखील व्यासपीठावर उपस्थित होते.
5G सेवेचा शुभारंभ करताना पंतप्रधान मोदी म्हणाले की, हा 21व्या शतकातील ऐतिहासिक दिवस आहे. 5G चे हे तंत्रज्ञान दूरसंचार क्षेत्रात क्रांती घडवून आणेल. हे डिजिटल इंडियाचे यश आहे. पंतप्रधान पुढे म्हणाले की 5G लाँच करण्याच्या ऐतिहासिक कार्यक्रमात गावे सहभागी होऊ शकतात हे पाहून आनंद होत आहे. देशातील शेतकरी असो की लहान दुकानदार, आम्ही त्यांना ऍपद्वारे त्यांच्या दैनंदिन गरजा पूर्ण करण्याचा मार्ग दिला आहे. ते म्हणाले, “आम्ही आमच्या देशाच्या सामर्थ्याकडे दुर्लक्ष करू शकत नाही.”
यासोबतच, डिजिटल इंडियाच्या 4 स्तंभांबद्दल बोलताना, पीएम मोदी म्हणाले की, आम्ही डिजिटल उपकरणांची किंमत, कनेक्टिव्हिटी, डेटाची किंमत आणि डिजिटल प्रथमच्या दृष्टीवर खूप भर दिला आहे. पंतप्रधान म्हणाले की, भारत 2G, 3G आणि 4G नेटवर्कसाठी इतर देशांवर अवलंबून आहे पण 5G मुळे भारताने एक नवा इतिहास रचला आहे. “5G सह, भारत प्रथमच दूरसंचार तंत्रज्ञानामध्ये जागतिक बेंचमार्क स्थापित करत आहे”.
डिजिटल इंडियाबद्दल बोलताना पंतप्रधान म्हणाले की, काही लोकांना वाटते की ही फक्त सरकारी योजना आहे. “पण डिजिटल इंडिया हे केवळ नाव नाही, तर देशाच्या विकासासाठी एक मोठे व्हिजन आहे.
5G सह डिजिटल इंडियाला गती कशी मिळेल
भारतात सध्या 50 युनिकॉर्न स्टार्टअप्स आहेत. म्हणजेच $1 बिलियन पेक्षा जास्त मुल्यांकन असलेले स्टार्टअप आहेत. आता 5G लाँच झाल्यानंतर परिस्थिती झपाट्याने बदलू शकते. पंतप्रधान नरेंद्र मोदी यांच्या स्टार्टअप योजनेला 5G नेटवर्कमधून नवीन पंख मिळू शकतात. 5G चे वेगवान नेटवर्क केवळ OTT वर ऑनलाइन व्हिडिओ किंवा वेब सिरीज पाहणे किंवा डाउनलोड करण्यापुरते मर्यादित राहणार नाही तर ते शैक्षणिक क्षेत्रात क्रांती घडवून आणेल. 5G डिजिटल शिक्षण पूर्णपणे बदलेल. याचा एक नमुना देखील एअरटेलने 5G लाँचच्या निमित्ताने दाखवला आहे.
5G च्या वेगवान गतीने, डिजिटल मोबाइल पेमेंट अयशस्वी होण्याची समस्या संपेल.
याशिवाय इंटरनेटशी संबंधित सर्व कामे वेगवान पद्धतीने पूर्ण होतील.
5G सह डिजिटल अर्थव्यवस्था मजबूत होईल
एका अहवालानुसार, 2025 पर्यंत भारताला ट्रिलियन डॉलरची डिजिटल अर्थव्यवस्था बनवण्यात 5जी महत्त्वाची भूमिका बजावू शकते. नोकियाचा वार्षिक मोबाइल ब्रॉडबँड इंडेक्स अहवाल 2022 दर्शवितो की गेल्या 5 वर्षांत 53 टक्के वाढीसह भारत जगातील सर्वात मोठा डेटा वापरकर्ता बनला आहे.
गेल्या वर्षी 2021 मध्ये देशातील डेटा ट्रॅफिकमध्ये 31 टक्क्यांनी वाढ झाल्याचेही अहवालात दिसून आले आहे. यामुळे प्रति वापरकर्ता सरासरी मोबाइल डेटा वापर दरमहा 17 GB पर्यंत पोहोचला आहे. 2021 मध्ये, 30 दशलक्ष 5G उपकरणांसह 160 दशलक्षाहून अधिक स्मार्टफोनची विक्री करून एक नवीन विक्रम भारतात प्रस्थापित करण्यात आला. यापैकी 4G स्मार्टफोन 80 टक्क्यांहून अधिक राहिले, तर 5G स्मार्टफोन्सची संख्याही 10 दशलक्ष ओलांडली.
या अहवालात असाही अंदाज वर्तवण्यात आला आहे की 5 वर्षांमध्ये देशातील 5G सेवांमधून मिळणारा महसूल 164 टक्के दराने वाढेल. यासोबतच 2030 पर्यंत जागतिक जीडीपीमध्ये एक लाख 30 हजार कोटी डॉलरचे योगदान देण्याचीही शक्यता आहे.
