चॅटजीपीचा वापर करुन प्रसिद्ध लेखकाने लिहिली तब्बल १०० पुस्तकं.
मुंबई :- चॅटजीपीटी यांसारख्या ए.आय. टूल्स च्या मदतीने टीम बाउचर नावाच्या लेखकाने तब्बल १०० पुस्तकांची निर्मिती केली आहे. न्यूयॉर्क पोस्टने याबाबतचे वृत्त दिले आहे.
मानवाला दैनंदिन कामांमध्ये मदत व्हावी यासाठी आर्टिफिशियल इंटेलिजन्स तंत्रज्ञानाचा वापर करुन ChatGPT ची निर्मिती करण्यात आली. या चॅटबॉटचा वापर अलीकडे वाढला आहे. चॅटजीपीटीच्या मदतीने लोक विविध काम करत असल्याचे पाहायला मिळते. या नव्या तंत्राबद्दल बऱ्याच लोकांच्या मनामध्ये कुतूहल आहे. लोक अनेक कामांसह ऑफिसमध्येही स्मार्ट असिस्टंट म्हणून चॅटबॉटचा वापर करत आहेत. चॅटजीपीटीमुळे अनेकांचे काम सुखकर झाले आहे. अशातच एका लेखकाच्या नावाची चर्चा सर्वत्र होत आहे. या लेखकाने चॅटजीपीटीच्या मदतीने सुमारे १०० पुस्तकं लिहिली आहेत.
न्यूयॉर्क पोस्टच्या बातमीनुसार, चॅटजीपीटी यांसारख्या ए.आय. टूल्स च्या मदतीने टीम बाउचर नावाच्या लेखकाने तब्बल १०० पुस्तकांची निर्मिती केली आहे. रोमांचक ई-पुस्तकं तयार करणे हे यामागील ध्येय्य होते असे टीम सांगतो. बाउचर या पुस्तकांना Al Lore series असे म्हणतो. “पुस्तकातील कथा या आर्टिफिशियल इंटेलिजन्स जनरेटेड विश्वाशी जोडलेल्या आहेत. A. I. मुळे मानवी सर्जनशीलता वाढण्यासाठी मोठी मदत होते”, असे त्याने म्हटले आहे.
टीम बाउचरने माध्यमांना दिलेल्या मुलाखतींमध्ये सांगितले की, “सुरुवातीला एकदा मी A. I. चा वापर करुन तीन तासांपेक्षा कमी वेळामध्ये एक पुस्तक लिहून संपवलं होतं. चॅटबॉट आणि इमेज जनरेटर यांच्या सहाय्याने लेखन जलदगतीने पूर्ण होते असे त्यांनी सांगितले. शिवाय त्यांनी सुंदर चित्रदेखील तयार केले. ” टीमच्या प्रत्येक पुस्तकामध्ये सुमारे ५,००० शब्द आहेत. तसेच त्यामध्ये A.I. जनरेटेड फोटोंचा समावेश आहे. ऑगस्ट २०२२ ते मे २०२३ या काळामध्ये टीमने आपल्या कथांच्या ५०० पेक्षा जास्त प्रती विकल्या आहेत. यातून त्याने २,००० डॉलर्सची कमाई केली आहे. सोशल मीडियावर टीम बाउचरची ही गोष्ट प्रचंड व्हायरल झाली आहे.
